O proxecto mineiro de Castriz segue dando que falar.A asociación Petón do Lobo insta a á Xunta de Galicia á paralización inmediata das “sondaxes ilegais” que se realizan nesta parroquia xalleira “en tanto que non someta a exposición pública o proxecto dos permisos de investigación mineira e o plan de restauración das catas, que a mercantil realiza na exploración de níquel, cobalto, cobre e terras raras”.
Desde Petón do Lobo aseguran que o dereito mineiro “Carmen” co que traballa a empresa sueca Eurobattery está caducado desde hai anos.
Informan que este dereito “abrangue núcleos habitados como o de Castriz, San Salvador, Vilartide, Vilardante de Arriba, Boaña de Abaixo, Boaña de Arriba, Boimente, A Choupana, Escanande, Estévez, Frieiro, O Hospital, A Mostaza, O Outeiro, Padreiro, Traba, Vento, Xallas, O Xesto, Castro, Choupana, Codeseira…etc”.
Desde este colectivo tamén instan ao alcalde de Santa Comba, David Barbeira, e á corporación local esixille á Dirección Xeral de Planificación enerxética e Recursos Naturais da Xunta de Galicia a paralización inmediata das prospeccións mineiras e o cumprimento estricto da normativa. E animan a veciñanza das parroquias de Castriz e San Salvador “ a organizarse para a defensa das súas casas e as súas terras.