Escoita a entrevista a Isabel Vilalba(Desde min 31)
A secretaria xeral do Sindicato Labrego Galego está convencida que as industrias aproveitan a “Lei da Cadea” e o actual marco como “excusa para adaptar os contratos e introducir baixadas de prezos”, o que constitúe “unha perversión absoluta”.
Nunha entrevista no programa “Na Encrucillada” de Radio Xallas, Isabel Vilalba, denunciou que a situación non mudou nos últimos anos, cos prezos “impostos unilateralmente” e sen “nada que obrigue a industria” a respectar condicións favorables ao sector lácteo.
“Nin o Ministerio nin a Xunta fixeron os deberes”
“Non hai unha protección do produtor. Nin o Ministerio nin a Xunta fixeron os deberes” lamentou a dirixente agraria que lamenta que o goberno autonómico aínda non fixera o estudo de custes de produción que prometeu, así como a ausencia de transparencia e de foros para tratar estes asuntos.
Para Vilalba o panorama aínda é máis desolador cando “hai xente que deixou impagos na recollida do leite e segue operando” con total normalidade.
Tamén incidiu que segue habendo problemas sen solución como os danos da fauna salvaxe:”Moita xente non cobra ou cobra cantidades ridículas”. Pediu xestión das poboacións, control sanitario e dotación orzamentaria suficiente.
Desde o S.L.G. demandan a protección dos agricultores e gandeiros galegos e a posta en valor dos seus produtos “de primeira calidade para manter a saúde”.
