A corporación decidiu adherirse a central de contratación da Fegamp e creación da Mesa local contra a violencia de xénero. María Xosé Alfonso asegura que está traballando na elaboración dos orzamentos.
Adhesión a central da Fegamp
No pleno onde se rexeitou o recoñecemento extraxudicial de crédito tamén se trataron outros temas.O concello de Muros acordou por unanimidade adherirse a central de contratación da Fegamp.A alcaldesa María Xosé Alfonso asegurou que era un asunto “interesante” e que supoñía “o primeiro paso para a contratación do subministro eléctrico”.O Partido Popular lamentou que “tardaran dous anos en darse de conta da existencia deste sistema”. No pleno celebrado o pasado xoves tamén se acordou a constitución da mesa local contra a violencia de xénero.
Adiante coa proposta do BNG sobre o Noitebús
Coa abstención de PP e PSOE e o apoio de Compromiso por Galicia, saíu adiante unha moción do BNG para a posta en marcha do servizo de Noitebús. O voceiro nacionalista, Manu García, falou da importancia deste servizo e acusou a populares e socialistas de buscar escusas para non apoiar o texto.
O PP pediu “un estudo máis profundo” e medidas máis amplas que tamén poidan afectar as “carencias” que hai no transporte urbano. Inés Monteagudo propuxo un convenio coa frota de taxis de Muros e pensa que os usuario tamén deben de financiar unha parte do servizo.
Caridad González solicitou que o asunto quedara enriba da mesa para analizar entre os grupos xa que considera que se trata “dunha proposta moi xenérica” que non ten un orzamento.”Non somos capaces de pagar a luz, para poñer un noitebús” manifestou a voceira do PSOE.María Xosé Alfonso apoiou a moción aínda que aclarou que hai que estudar a viabilidade do seu financiamento.
Orzamentos sen data
Na quenda de rogos e preguntas, e en resposta á voceira socialista, a alcaldesa María Xosé Alfonso asegurou que o equipo de goberno estaba traballando na elaboración dos orzamentos pero non preciso unha data aproximada de remate dos mesmos.
