A choiva non impediu que unha treboada rockeira invadise Pozo Negro. Almas eléctricas conectadas. Bandas entregadas que se retroalimentaban do público. Un festival gratuito cun cartel con moito valor. Iniciaron o carrusel musical e encenderon a luz con efectividade os lucenses Kalte Sonne, recolleron o facho Welcome e continuaron Tálesien (con aires renovados e moito que dicir). E subiron o palco Music in Low Frequencies, The Fall of Atlantis, Nukore e Godiva. Sen decaer eses raios decibélicos que penetraron na madrugada.
Valoración do Areabesta Festival 2026
Desde Lobos de Metal contactamos coa organización, a asociación Areabesta, para escoitar as súas sensacións. .
P- Que valoración facedes desta edición?
R- A valoración desta edición é moi positiva. A acollida foi moi boa, o nivel das bandas foi excelente e todas o deixaron absolutamente todo no escenario, demostrando unha enorme profesionalidade. Pero tamén hai que destacar ao público, porque eles tamén o deixaron todo e foron unha parte fundamental do ambiente tan especial que se viviu.
Cada ano isto vai a máis, e nótase todo o cariño que a xente lle ten ao Areabesta. Este festival irrompeu na escena dunha maneira moi besta, cunha forza e unha personalidade difíciles de ignorar. Polo entorno, pola súa esencia, polo seu enfoque e por esa sensación de que todo está feito desde dentro, pola escena e para a escena. Hai algo que o fai diferente: non parece un festival creado d…esde fóra. Séntese auténtico. Séntese noso.
Cando as cousas se fan con paixón, coñecemento e respecto por unha escena, o resultado acaba falando por si só. E pensamos que o Areabesta Festival é un claro exemplo diso.
P-Que destacaríades do evento e queredes facer algún agradecemento?
R- Sen dúbida, destacariamos o ambiente que se viviu. Esa é unha das grandes maxias do Areabesta Festival: a conexión entre as bandas, o público e a organización, todos compartindo unha mesma paixón pola música nun ambiente moi especial.
Tamén é fundamental o entorno no que se celebra. Poder desfrutar dun festival de metal en plena natureza, ao lado dunha praia fluvial e nun concello rural, dálle ao Areabesta unha identidade única. É unha experiencia que vai moito máis alá dos concertos.
E, por suposto, tamén queremos destacar que o Areabesta é un festival gratuíto. Conseguir ofrecer unha proposta destas características, con bandas de gran nivel e nun entorno tan especial, mantendo o acceso libre para o público, é algo do que estamos moi orgullosos.
Queremos agradecer especialmente ás institucións que apostaron polo Areabesta Festival e que contribúen a facer posible este proxecto: o Concello de Cerdedo Cotobade, a Deputación de Pontevedra e a Xunta de Galicia.
Tamén aos patrocinadores privados que se sumaron ao proxecto, especialmente a Tico Música e a Spira Guitars, por cedernos unha guitarra para sortear entre a nosa comunidade.
O noso agradecemento tamén para todos os festivais que nos apoiaron e cos que fomos tecendo alianzas. Pensamos que é moi importante que os festivais e os diferentes proxectos da escena se apoien mutuamente e camiñen na mesma dirección.
E, por último, pero seguramente o máis importante, grazas a todas as persoas que veñen cada ano ao Areabesta, que se desprazan ata aquí para vivir esta experiencia e compartir connosco un día de música en plena natureza. Porque sen ese público, sen ese cariño e sen esa resposta, todo isto non tería sentido.Grazas, simplemente GRAZAS!
FOTOS-DAVID FIGUEROA
