Manuel Silveira é un clásico do rock na bisbarra. E como di a canción que acaba de lanzar con 12 Labirinto segue “Bourando”, décadas despois.
Formou parte dos Zënzar e foi o fundador do programa pioneiro do rock na zona “O Inimigo Dentro” de Radio Cerceda.
Deixou un importante traballo de divulgación rockeira nas ondas e anos de concertos e cancións compostas na coñecida banda galega.
Actualmente compaxina a súa paixón musical entre as bandas Máxica e 12 Labirinto.
«Bourando» e «Renacer»
Con esta última acaba de lanzar dous temas que presentou no programa “Na Encrucillada” de Radio Xallas. Unha nova versión de “Bourando” (á terceira semella ser a definitiva) e o tema “Renacer” que explica as orixes deste novo proxecto musical. Composicións gravadas nos Bonham Studios de A Coruña.
12 Labirinto nunca mantivo unha formación estable. Xunto con Silveira (guitarra e voz) o membro máis veterano é Jesús Abarca (baixo e voz). Recentemente incorporouse o batería Iván Couto e o guitarrista larachés Juan Carlos Cotelo, un nome propio do heavy metal en Bergantiños, colaborador de Lobos de Metal e membro da banda Tálesien.
A banda formada en Meirama no 2007, participa este sábado 20 de xullo na Batalla de Bandas do Flores Rock.
Esta é a conversa que mantivo Manuel Silveira con Xosé Manuel Lema en Radio Xallas. Desde o minuto 60.