Mateo Pichel e Xaquín Lema entraron coas súas guitarras afiadas dentro do agocho onde os Lobos de Metal gozan da música que lles gusta. Viven entre riffs poderosos e poemas ferventes.
Cada mércores ouvean polos montes hertzianos e as fragas de internet. Nesta ocasión, acompañados por dous músicos dun grupo emerxente de metal que chega desde a Terra de Soneira.
Chámanse Teima e desde Vimianzo ouvean tamén con forza, con temas como “Lume e espiñas” ou “Túa nai é meigha”. Este mércores, desde as 20h, participarán no programa que se emite desde Radio Xallas (107.5 FM) e internet (escoita aquí). E tamén en formato Podcast en Ivoox, Spotify ou Google Podcast. Na mesma emisora repítese o programa o xoves ás 13,00h.
Xunto con Teima no programa “número 17” de Lobos de Metal soarán novidades musicais, e compartíranse poemas, noticias e axenda de concertos. Xunto con Mateo e Xaquín forman parte de Teima o baixista Fabio Mouzo e o batería Pablo Alvite.
