Entrevista ao alcalde de Cee, Ramón Vigo Sambade.
Ramón Vigo Sambade afronta o último ano de lexislatura, despois de liderar a forza máis votada en 2015. Quere abrir a piscina municipal e licitar o Plan Xeral antes de esgotar o mandato. Un proxecto de IxCEE que pretende continuar porque está convencido de que é a mellor opción para o pobo.
P- Está sendo especialmente dificultosa esta lexislatura pola situación do goberno?
R-Todas as lexislaturas nas que non hai unha maioría sólida ou acordos de goberno fanse máis complicadas de levar. Houbo diversos cambios. É complicado ter un goberno de tres concelleiros nunha corporación de trece.Pero teño que dicir que tivemos unha oposición bastante responsable e nos grandes temas houbo acordos e todo funciona con normalidade.
Reitero que é moi importante que a forza gobernante teña unha maioría que lle permita levar adiante os seus proxectos ou haxa un acordo que marque unhas liñas.Nesta situación vanse facendo cousas pero a veces non hai un fío condutor que é o que transforma os pobos.
P-Que cuestións desexaría solucionar ou encamiñar antes de rematar a lexislatura?
R-Gustaríame deixar a piscina aberta. Estamos co proceso de contratación e espero que non haxa problemas. Tamén estamos facendo as obras necesarias. O grande problema da lexislatura quedaría resolto.
E tamén deixar licitado o Plan Xeral de Ordenación Urbana. Cambiou a lei cando xa estaba redactado e quedou desarmado. Agora mesmo o obxectivo e deixa-lo licitado. É fundamental e necesario para poder desenvolver o concello de Cee. As normas subsidiarias están obsoletas e crean moita inseguridade xurídica.
P- Como analiza a situación actual. Parece que o patio está algo revolto.
R-Hai unha situación curiosa no abano da dereita.Aparecen paracaidistas por todos os lados. Parece o segundo desembarco de Normandía. Pero en Cee sempre houbo moita oferta política nas eleccións. O pobo é sabio e reparte como considera e coloca a cadaquén no seu sitio. Os ceenses decidirán se merecemos continuar no goberno ou se debe haber un cambio e da man de quén ten que ver.
P-Unha alternativa que para moitos agora mesmo non está moi clara…
R-Non houbo unha oposición definida. Todos os grupos teñen os seus liderados pero eu non vexo unha alternativa, unha proposta ilusionante de facer as cousas. Eu penso que a aposta segura é continuar co goberno que teñen, de garantía de seriedade, traballo e entrega ao pobo de Cee.
P- Unha longa historia dentro dun partido independente…
R-Fomos medrando progresivamente ao longo dos nosos 23 anos de historia. Sempre mantivemos unha actitude activa e tivemos unha resposta da cidadanía importante.
Gañamos as eleccións no 2011 e no 2015. Cee sempre referendou o noso traballo, valorounos positivamente, e cando tivemos a posición máis importante no goberno municipal, os veciños souberon valorar o traballo de Independentes por Cee. Somos un grupo aberto. A nosa forza é a nosa transversalidade. O interese de IxCee é o desenvolvemento do noso territorio.
