Garcilaso de la Vega é o candidato de Converxencia 21 á presidencia da Xunta de Galicia e encabeza a lista pola provincia de Lugo. Entre as súas propostas prioritarias está liberar ás empresas dos atrancos burocráticos que existen na actualidade. Este foi o resultado da entrevista no Adiante Galicia.
P-Hai un sitio relevante no mapa político galego para unha forza como Converxencia 21 cando as posicións galeguistas e nacionalistas están claramente escoradas cara á esquerda?
R-Nós entendemos que si. De feito, Converxencia 21 fundouse para darlle unha opción nova a todas aquelas persoas galeguistas que non concordan co monopolio que a esquerda se adxudica no eido do galeguismo. Este monopolio foi moi prexudicial e, ao noso entender, levou o galeguismo á situación actual na que se atopa.
P-Dáme unha ou dúas razóns para votar por Converxencia 21?
R-Converxencia 21 non fornece de solucións doadas porque non fucionan. Estamos nun intre de mude e as solucións doadas que ofrecen os demáis partidos só levan á decepción. Somos os únicos que dicimos isto porque apelamos á razón, non á emoción. Neste eido, Converxencia 21 fai propostas en positivo, sen enganos, sen prometer o que sabemos que non imos poder cumprir. Somos diferentes.
P-Non contemplaron a posibilidade de promover alianzas con outros partidos para estas eleccións?
R-Por suposto. Converxencia 21 é un partido que sempre está disposto a falar e a promover alianzas con outras forzas. Nós fomos uns dos promotores do foro de diálogo para a confluencia do galeguismo de centro e temos abordado outros intentos de alianza ao longo da nosa historia. A día de hoxe tal cousa non foi posíbel por distintas razóns mais a nosa porta sempre está aberta para falar con outras forzas.
P-Se o 25S Converxencia 21 tivera presenza no Parlamento de Galicia cales serían as vosas propostas ou demandas preferentes?
R-As nosas propostas están no noso programa electoral que temos colgado na nosa web www.converxencia.gal. Convidamos aos lectores a visitala.
Como medida prioritaria demandariamos medidas para deixar as empresas prosperar. As empresas non poden atopar unha chea de atrancos burocráticos á hora de desenvolver a súa actividade. Hai que poñerllo doado, é o único xeito de crear un tecido productivo no país que nos leve a rematar coa lacra do paro e a unha maior prosperidade.
P-Como está sendo a vosa campaña?
R-A nosa campaña está a ser unha campaña ilusionante. As eleccións sempre son un escaparate de primeIra para poder facer chegar a nosa mensaxe aos cidadáns, para dicirlles que hai outras opcións alén do de sempre. Por iso estamos a centrar a nosa campaña en facer propostas, en explicar que é o que nós fariamos no caso de chegarmos ao goberno.
P-Por último déixolle este espazo para que vostede traslade aos nosos lectores o que considere oportuno.
R-Dende Converxencia 21 queremos dicirlle aos cidadáns que o día 25 vaian votar. Sabemos que dada a situación política actual moita xente pode estar un pouco desalentada tendo en conta a irresponsabilidade doutras formacións que pasan o día falando de diálogo mais que non son quen esquecer as súas liñas vermellas. Mais estas son outras eleccións, son as eleccións galegas e xogámonos moito nelas.
Xogámonos seguir co de sempre, implementar medidas mil veces postas en práctica e mil veces fracasadas ou implementar algo novo, o que ofrece Converxencia 21. Xa que logo, apelamos os cidadáns a que escoiten as distintas formacións que nos presentamos para poder tomar o 25 unha decisión informada. O cidadán é sabio e sabe separar o gran da palla.
