Christian Pensado Recarey, de Mazaricos, é o representante da Costa da Morte no concurso “Recantos” do veterano programa da TVG, “Luar”. Adiante Galicia quixo conversar con este mozo. E así o fixemos.
P-Cómo te sentes ao poder representar á Costa da Morte no concurso da TVG?
R-Pois a verdade é todo un privilexio poder representar á Costa da Morte, o meu recanto, no cal nacín e me criei. Ó seu tempo é unha responsabilidade, xa que todas as representantes que pasaron por Recantos e defenderon á Costa da Morte posuían un gran nivel e moito apoio dos nosos veciños, eu incluído. E contento, como non, de ser o primeiro rapaz (home) que represente este Recanto.
P- De tódolos xeitos, esta non é a primeira vez que estás diante das cámaras?
R- Exacto. Xa andiven por diversos programas da TVG, coma por exemplo no Bamboleo, na súa sección do Agora ou Nunca, no programa Aquí Galicia, cantando cunha gran amiga de Carnota e no programa A Toda Salsa, presentado por Jose Costas. Despois, o ano pasado, tamén estiven a piques de entrar nun programa a nivel nacional chamado La Voz, pero non houbo sorte na selección final, os nervios poden con un, e nesa vez xogáronme unha mala pasada.
P- Cales son os teus estilos musicais favoritos?
R- Decántome polo pop, pero polo pop británico, neste estilo a miña artista favorita é Adele, polas súas grandes composicións, o sentimento e o gran vozarrón que ten. Pero tamén me encanta o soul, o rock, e as baladas. Era e son moi fan de Amy Winehouse e de Withney Houston, dúas grandes voces do panorama internacional que me engancharon dende o primeiro segundo que as escoitei. Se teño que destacar a alguén máis, evidentemente sería o gran Michael Jackson, a Céline Dion, James Arthur ou John Legend entre outros.
P-Tania Fuegho, Iria Quintáns, Iria Bermúdez,Christian Pensado.. parece que Mazaricos é un berce de artistas..
R– Pois a verdade é que non es o primeiro que mo di, jajaja, sinceramente admiro as 3 gran voces de Mazaricos que se deron a coñecer na TVG e apoiei no seu momento e apoiareinas sempre que o precisen, declárome fan das 3, jajaja. No caso de Iria Quintáns, estudei no mesmo colexio e instituto ca ela, e xa competimos algunha que outra vez nalgún festival da canción, coma por exemplo no do Xallas, e a súa voz hai que recoñecer que me pon os pelos de punta, transmite moitísimo e iso gústame. Pero a verdade é que sería un privilexio cantar con calquera das 3 nalgunha ocasión, de verdade.
P- Cómo podemos facer para apoiarte neste concurso e cando está previsto que actúes?
R- Pois xa teño a data da actuación desta primeira fase, que será o vindeiro Venres 23 de Setembro. Actuarei coa recanteira de Arousa, e antes de comezar a actuación vannos a asignar un número de teléfono a cada un, ó cal podedes chamar 5 veces de cada teléfono gratis; e por suposto ó cal vos pido de corazón que chamedes, porque os votos do público son moi importantes, e a veces decisivos.
De todas formas, podedes darlle a «me gusta» e seguir os meus movementos na páxina do Club de Fans no Facebook, a cal é: https://m.facebook.com/clubfanschristianpensadorecantosluar/
P- Algo que engadir pola túa parte?
R- Dende aquí quería darlle as gracias a xente que xa me está mostrando cariño e apoio, ós meus veciños de Alborés e sobre todo a comisión de festas por pegarme alí os carteis na cantina, jajaja, as comisións de festas da Costa da Morte nas que me deixaron subir a cantar á orquesta, ás orquestas nas que actuei, a tódolos comerciantes que se prestaron para pegarme o cartel da actuación, ós meus amigos polos ánimos, e sobre todo a ti polo pracer de facerme a entrevista. Gracias a todos, de verdade!.