Escanos en Branco pretende recoller os votos en branco para trasladar esa mensaxe ó Parlamento deixando baleiros os escanos. Conversamos co candidato pola provincia de Pontevedra, Xurxo Fernández Alonso.
P- Basicamente vostedes aspiran a ser elixidos para non tomar posesión dos seus escanos…Explíquenos os aspectos fundamentais do partido
R-Trátase de dar representación real e efectiva ó voto en branco pois do xeito como está configurado actualmente non ten ningunha efectividade. Entendemos que a xente que vota en branco o fai porque non hai ningún partido, candidatos ou programas que a convenza. Esa xente pode optar por non ir votar, por simple desafección coa clase política actual pero aínda así se toma a molestia de ir votar en branco. Nós pretendemos que o seu voto teña representación efectiva. De feito, cando o voto en branco sexa tido en conta deixando baleiros os escanos proporcionais que corresponden a votos en branco o noso traballo terá rematado con éxito e non será necesario un partido como Escanos en Branco.
P- ¿Algunha proposta para mellorar a sanidade, a educación ou o país en xeral?
R-Non, Escanos en Branco non pretende aportar nada neses aspectos. Escanos en Branco non ten unha ideoloxía política nin de esquerdas nin de dereitas. Simplemente entendemos que cada persoa ten a súa ideoloxía pero que moita xente non se fía dos políticos actuais.
P-¿Cales son os seus obxectivos electorais nestes comicios en Galicia?
R-Que a xente saiba, cada vez máis, que non hai por que votar obrigatoriamente a Menganita ou a Fulanito, que se pode votar sen axudar, nin sequera indirectamente, a eses partidos que non lles convencen.
P- ¿Déixolle este espazo para que traslade a mensaxe que considere oportuno aos nosos lectores..
R-Os políticos e a política son necesarios. Alguén ten que organizar, lexislar, gobernar, administrar diñeiro público… Pero ten que ser xente honesta e da que te poidas fiar, se non é así sempre tes a opción de escoller que ninguén se aproveite do teu voto.
