Entrevista exclusiva a Alfonso Rueda en Adiante Galicia. Nesta segunda parte da conversa con Xosé Manuel Lema (@xmlema), Alfonso Rueda destaca os problemas internos do PSdeG e a situación de falta de liderado de Gómez Besteiro.
Pensa que o Partido Socialista «non está preparado para gobernar». En contraposición sitúa ao PPdeG que cunha política responsable e o esforzo dos galegos está mellorando a situación do país. Tamén se refire a episodios como a moción de censura de Lugo, que atribúe a «intereses persoais e ocultos».
Conversa con Alfonso Rueda-Segunda parte
P)¿Por qué se apoia unha moción de censura en Boimorto e se critica unha moción de censura na Deputación de Lugo?
R)Moi fácil. Nós sempre defendemos que debe gobernar o partido máis votado e en Boimorto o PPdeG gañou os comicios municipais. O mesmo pasou na Deputación de Lugo, onde o Partido Popular volveu ser o partido más votado e sen embargo outros decidiron tombalo… Non creo que a maioría dos galegos estea de acordo con esa decisión que, ao noso parecer, vén motivada por intereses ocultos e persoais, que nada teñen que ver coa deputación e con exercer un servizo público á cidadanía.
P) Mariano Rajoy critica unha suposta radicalización de Pedro Sánchez e do PSOE. ¿Está o PSdeG nesta mesma liña de radicalización ou non?
R)O que está claro é que os socialistas en Galicia estiveron dispostos a pactar con quen fixera falta para evitar que o Partido Popular, que foi a forza máis votada na maioría de municipios, non puidese gobernar. Para acadar este obxectivo, ao PSdeG non lle importou chegar a un acordo con quen fose preciso, pasando por riba de ideoloxías e de calquera tipo de programa e promesa electoral.
Ademais, os problemas internos do PSdeG neste momento concreto son máis que evidentes, cun secretario xeral, Xosé Ramón Gómez Besteiro, que non perde a oportunidade de amosar a súa falta de liderado.
Sucesos como a vergoñenta moción de censura perpetuada na Deputación de Lugo e na que o seu propio Besteiro se negou a dar a cara; os problemas derivados do número de cargos que tIñAn Beatriz Sestayo e Carlos González Santín, os cales non desaproveitan ningunha oportunidade para evitar apoiar ao seu secretario xeral; a guerra aberta que este ten en Ourense provocada pola súa actuación coas listas das Xerais; ou a renuncia en Ferrol dun candidato socialista ao Senado tras considerar tamén que hai falta de transparencia e escurantismo na elección das candidaturas, súmanse á xa máis que complicada situación de Besteiro coa xustiza.
Sen dúbida, todos estes feitos reafirman que o PSdeG non está preparado para asumir responsabilidades de goberno a ningún nivel: nin local, nin provincial, nin autonómico.
P) Señor Rueda ¿Galicia vai ben?
R) Galicia vai mellor do que ía … E iso foi posible grazas ao esforzo de todos os galegos e galegas e á política responsable da Xunta. Agora avanzamos no camiño da recuperación e iso foi posible grazas a recuperación do emprego, da economía, do consumo, da confianza e da fe nas posibilidades de futuro de Galicia.
Os orzamentos de 2016, que se veñen de aprobar, serán un punto de inflexión para conseguir todos eses obxectivos e por iso vense reforzados con 400 millóns de euros máis que no actual exercicio.
Ademais, como xa avanzamos no Debate do Estado da Autonomía, a recuperación das contas públicas se destinará á recuperación dos fogares, coa maior baixada de impostos nuns orzamentos e maior apoio directo á infancia e ás familias.O obxectivo, como me preguntaba antes, é responder ás demandas da xente de que os efectos da recuperación cheguen a todos os fogares, que se siga creando emprego, que se fortalezan os sectores primarios e que o impulso social e económico se complete tamén co impulso territorial.
P) Por último, gustaríame agradecerlle a súa colaboración con Adiante Galicia, e déixolle este espazo por se quixera engadir algo. Moitas grazas.
R)Grazas a vostedes por darme a oportunidade de explicar certos asuntos que considero importantes e que as veces, polos ritmos de traballo, non hai tempo de abordar dun xeito máis pausado. Por iso gustaríame felicitalos polo seu traballo e destacar a importancia dos medios de comunicación coma o seu, que permite aos cidadáns informarse.
