Un novo accidente cun tractor obriga a evacuación urxente dun veciño de Touro.O home resultou ferido de gravidade ao pasarlle por riba dunha perna o vehículo agrícola que manexaba nun predio da súa propiedade.
Segundo os datos recollidos no 112 Galicia, o sinistro produciuse ás 10:30 horas en Sobredo, Foxás. Alí acudiu un equipo de Urxencias Sanitarias de Galicia-061 a bordo do helicóptero medicalizado con base en Santiago co fin de executar o traslado urxente do doente debido ás lesións que presentaba na extremidade inferior.
Para colaborar nas tarefas de aterraxe da aeronave, os xestores do 112 Galicia tamén pediron a intervención dos axentes da Garda Civil e dos voluntarios de Protección Civil da localidade.
