-AXEGA 112-
Os bombeiros deron por extinguido o lume que se iniciaba a primeira hora desta mañá nun cuberto con palla e leña na parroquia de Coucieiro, no Val do Dubra, en concreto, no lugar de Vilalba.O 112 Galicia tiña coñecemento dos feitos, pouco antes das oito da mañá a través da chamada dun particular e, de xeito inmediato, deuse aviso aos Bombeiros do Xallas, á Garda Civil e a Protección Civil do concello.
Cando chegaron ao lugar, os bombeiros dedicaron os seus esforzos a sacar as pacas de herba ao exterior do cuberto para así poder apagar o lume e arrefrialas.
Finalmente, os servizos de extinción sinalaron que arderan máis dun cento de grandes pacas de herba seca e que, da estrutura onde estaban gardadas, só se viu afectado o teito, xa que se trataba dunha nave aberta que non tiña laterais.
