– AXEGA 112-
A muller que percorría a senda Camiño dos Faros, en Malpica, atopábase en Punta Ensubelas, nun lugar de difícil acceso, segundo indicou a persoa que chamou ao 112 para pedir axuda.Sobre as 15:15 horas desta tarde, unha persoa particular solicitaba asistencia sanitaria ao 112 para unha muller que non se podía mover. Indicaba que se atopaban na Costa da Morte, facendo a senda do Camiño dos Faros, nun lugar ao que só se podía acceder por terra e por aire.
Con estes datos, os xestores do 112 puxeron os feitos en coñecemento da Garda Civil e dos membros do GES de Ponteceso. De igual xeito, informaron ao Servizo de Urxencias Sanitarias de Galicia-061, á Policía Local e aos efectivos de Protección Civil da localidade. Tamén os Bombeiros de Carballo foron avisados por se fose precisa a súa intervención.Finalmente, a muller, conseguiu chegar ata o punto onde a agardaba unha ambulancia para ser trasladada ao centro hospitalario de referencia.