AXEGA 112 –
O xeo está a dificultar a circulación, especialmente por vías secundarias, nas que cómpre extremar a precaución co fin de evitar accidentes. Así, un condutor de autobús de liña detivo a súa marcha pola AC441, en Baíñas, Vimianzo, ante a imposibilidade de seguir circulando pola presenza de xeo na estrada.
Segundo relatou a persoa aos xestores do 112 Galicia, notou que o autobús esvaraba e, decontado, detivo a marcha. De feito, os axentes da Garda Civil de Tráfico comprobaron a situación e solicitaron recursos para a mellora das condicións de seguridade na vía. Deste xeito, o 112 Galicia pediu a colaboración do persoal da Axencia Galega de Infraestruturas.