INFO-AXEGA 112
O incendio nun vehículo sorprende a outro condutor e provoca un accidente.Sucedeu pouco antes das once esta mañá na estrada que une Seoane con Ponte Maceira, á altura do desvío cara a Santa Comba.
O 112 Galicia tivo coñecemento do sinistro mediante a chamada dunha persoa particular que alertaba dunha colisión con persoas feridas. Deste xeito, o persoal do Centro Integrado de Atención ás Emerxencias de Galicia solicitou a intervención dos profesionais de Urxencias Sanitarias de Galicia-061 e dos axentes da Policía Local, que, unha vez no lugar, comprobaron que o accidente produciuse pola distracción dun condutor ao quedar mirando para outro vehículo ardendo. Por este motivo, saíuse da vía e bateu contra un terceiro turismo. Como consecuencia do golpe, dúas persoas resultaron feridas e necesitaron asistencia médica.
Efectivamente, uns minutos antes, preto das 10:30 horas, o 112 Galicia recibiu varias chamadas de persoas que advertían dun coche ardendo cando se desprazaba pola mesma vía. Para facer fronte á situación, os xestores do 112 Galicia avisaron aos Bombeiros de Santa Comba, así como aos membros do GES de Brión e á Garda Civil de Tráfico.
Apenas un cuarto de hora despois, o incendio do vehículo sorprendeu ao condutor doutro coche e provocou o accidente. En canto ao incendio, os efectivos de extinción confirmaron que o turismo ardeu por completo sen provocar danos persoais. Con todo, os bombeiros segue traballando no lugar para limpar a vía e restablecer as condicións de seguridade.
