AXEGA112-
O helicóptero da Garda Civil localizou esta mañá á muller cuxo paradoiro se descoñecía desde o pasado xoves despois de desaparecer no termo municipal coruñés de Tordoia. Segundo a información facilitada ao 112 Galicia, a señora foi atopada en bo estado de saúde, aínda que recibiu asistencia médica nunha ambulancia.O achado produciuse no lugar de Casais, arredor das 10:45. Nese momento, os axentes da Garda Civil daban conta ao 112 Galicia do sucedido.
Deste xeito quedou pechado o operativo de busca, que se iniciou na madrugada do venres e que estivo composto pola Unidade de Drons da Axega, a Policía Local de Tordoia, a Garda Civil e as Agrupacións de Voluntarios de Protección Civil de Ordes, do Val do Dubra, de Carballo e de Padrón con catro cans de rescate.
O 112 Galicia tivo constancia da desaparición da muller a noite do xoves, a través da Policía Local de Tordoia. Os axentes indicaban no seu relato que unha muller, de 79 anos de idade, saíra da súa casa pola tarde e non regresara.
Tras esta comunicación, dende o CIAE 112 Galicia mandouse aviso á Garda Civil, que activou o operativo de busca ao que se foron sumando os servizos de emerxencias.
