Unha persoa tivo que ser trasladada por inhalación de fume ao Punto de Atención Continuada de Carballo despois de producirse un incendio nunha vivenda da localidade. Segundo se lle indicou ao 112 Galicia, un matrimonio e a súa filla quedaron atrapados no interior da casa tras declararse o lume e foron rescatados pola Policía Local.
O incendio, que se rexistrou na terraza cuberta da vivenda, calcinou varios electrodomésticos e unha lareira que había na estancia.Os feitos ocorreron no lugar da Brea, ás 16:00 horas. Nese momento o 112 Galicia recibía a alerta do incendio a través dun particular. Indicaba que saía fume do tellado da casa.
Acto seguido, dende o Centro Integrado de Atención ás Emerxencias (CIAE) 112 Galicia púxose a situación en coñecemento dos Bombeiros de Carballo, da Garda Civil, de Protección Civil e do 061-Urxencias Sanitarias.
Unha vez na vivenda, os servizos de emerxencias sufocaron o lume e arrefriaron a zona afectada.
