Efectivos de Protección Civil de Muxía rescataron esta madrugada o corpo dun home na Praia Rua Coido, no concello coruñés de Muxía. Foi unha persoa particular quen, pasados uns minutos das 02:30 horas desta noite, alertou ao 112 Galicia.
Indicaba que vía un rapaz flotando na auga e que podía estar falecido. Aseguraba, ademais, que estaba accesible, atopábase na beiriña do mar.
De inmediato, o persoal do Centro Integrado ás Emerxencias do 112 (CIAE) puxo os feitos en coñecemento do 061-Urxencias Sanitarias e das Forzas da Orde. Así mesmo, informou a Salvamento Marítimo, Servizo de GardaCostas e aos efectivos de Protección Civil que se encargaron de rescatar o corpo do home falecido.
