A explosión dun forno de gas rexistrada onte nunha vivenda do concello de Ponteceso sáldase cunha persoa ferida por queimaduras. A vítima resultou ferida de carácter leve e acudiu polos seus propios medios a un centro sanitario.
Os feitos tiveron lugar nunha propiedade da rúa Arnela, na parroquia de Corme Porto. A pesar do estoupido do forno, o resto da estancia non se viu afectada. Tampouco sufriu dano algún a bombona situada a carón do forno.
Foi unha persoa particular a que deu a voz de alarma ao 112 Galicia ás 22:00 horas de onte.
O persoal do Centro Integrado de Atención ás Emerxencias informou ao 061-Urxencias Sanitarias, aos Bombeiros de Bergantiños, ao GES de Ponteceso, a Protección Civil e á Garda Civil. A situación tamén foi posta en coñecemento da empresa responsable da subministración de gas.
