O concello de Mazaricos promocionará mañá no Salón Internacional de Gastronomía e Turismo Xantar 2017 de Ourense os Bolos do Pote.
Este produto típico asociado ao cocido galego fixo de substituto do pan en épocas de fame e carestía. O seu sabor particular fai del un prato curioso. Para dalos a coñecer únense os Hostaleiros e as Amas de Casa que fomentarán o selo de calidade dos #ProdutosMZ. Por outra banda, ás 3 da tarde terá lugar o showcooking para que os asistentes poidan ver a receita dos bolos. Dito show será retransmitido en directo no facebook do Concello.
O rexedor do concello, Juan José Blanco Riveiro afirmou que «ademais dos bolos do pote levamos dous produtos de alta calidade en Mazaricos, o pan e a carne». Ao fío disto engadiu que «buscamos a maior difusión posible dos nosos recursos para potenciar o sector turístico». Por outra banda, e de cara á Festa do Bolo do Pote, o concello organizará un concurso para os nenos e nenas do Concello, a través dos colexios, para que plasmen este prato. «É importante que as nenas e os nenos tomen consciencia das tradicións da súa zona porque é iso o que crea arraigo e sentimento de pertenza a unha comunidade», explicou o alcalde.
