Cristina Barcia (Xefa de Comunicación Partido Galego)
A campaña electoral remata hoxe e queremos expresar o noso agradecemento á xente que nos acompañou en cada mitin, que nos escoitou e que enviou suxestións para a elaboración do noso programa. Tamén queremos agradecer ás persoas que axudaron ao noso equipo na campaña de porta a porta. Moitas grazas a todas e a todos.
Fixemos o noso mellor esforzo para chegar a todos os veciños, a pesar de que as regras do xogo cambiaban segundo a conveniencia de algúns.
Tivemos que modificar o noso calendario de mitins en varias ocasións porque outros partidos solicitaron os mesmos lugares na mesma data. Porén, como non temos representación, a Xunta Electoral non nos concedeu preferencia. Foi unha sorpresa descubrir que, por exemplo, en Fontecada, no día que o pedimos e se nos negou o local, ningún outro partido realizou un mitin alí.
Ademais, houbo locais que non estaban autorizados pola Xunta Electoral e que foron habilitados polo Concello na véspera do primeiro día de campaña, entre outras cuestións. En toda Santa Comba, os partidos empapelaron lugares nos que a Xunta Electoral non permitía publicidade.
No boletín da data 09 de maio, publicáronse os espazos autorizados para a colocación da propaganda electoral. O único espazo permitido para carteis en espazos públicos era o panel situado no campo da feira. Tamén se indicaban as farolas autorizadas para este fin nas rúas Avda. Santiago, Alfonso Molina, Avda. Brasil, Avda. Mourelle, Rúa Pontevedra, Rúa María Pita e Rúa Antonio Tomé Taboada.
Calquera publicidade que non se axuste a estas indicacións é totalmente ilegal e abusiva. Non obstante, como todos poden comprobar, ningún partido, excepto o Partido Galego, cumpriu as indicacións da Xunta Electoral de Zona (XEZ). Dende o noso partido presentamos a denuncia correspondente ante a XEZ, e esta enviou unha notificación a todos os partidos para que retirasen toda a publicidade que non cumprise co mencionado anteriormente.
Despois falan de legalidade, de campañas limpas, etc. Pero está á vista o que cada un fai na realidade.
O Partido Galego de Santa Comba demostrou que cumpre as normas, mentres que os demais incumpren as regras do xogo electoral. Un exemplo diso é que o PP denunciou catro carteis que tiñamos colocado na zona de Castro de Freixeiro, en postes que non pertencen ao alumado público. Tan pronto recibimos a notificación da XEZ, retirámolos de inmediato. As outras agrupacións políticas tamén foron notificadas, pero está claro que non están a obedecer as ordes que lles foron dadas.
De todas as maneiras, temos a conciencia tranquila de que fixemos unha campaña limpa, bonita e responsable. Ao contrario dos demais, non partiu da boca de ninguén do noso equipo un único ataque a ningún dos candidatos, porque a política non se fai así, non debemos acostumarnos a unha campaña sucia e calumniadora. Por iso temos moito orgullo de ter pasado por estes días sen unha soa mancha no noso percorrido.
Moitas grazas a todas e a todos, de corazón, de todo o equipo do Partido Galego de Santa Comba. Vémonos nas urnas o 28 de maio.
