A portavoz nacional, Ana Pontón, asistiu en Carnota á presentación da candidatura do BNG que volve a encabezar o ex alcalde Ramón Noceda.
“Moncho volve encabezar a candidatura do BNG porque ama este concello. É unha persoa que quere a Carnota, que leva esta vila na cabeza e no corazón e que é capaz de facer que avance” declarou Pontón.
Referiuse a Moncho ““un candidato que non precisa presentación, ben coñecido pola veciñanza, que foi durante moito tempo o alcalde de Carnota e que volverá selo a partir do 28 de maio”.
Un concello de portas abertas
E manifestou que “Moncho xa demostrou como alcalde que é capaz de darlle a Carnota calidade de vida, servizos públicos, actividade económica, social e cultural. Demostrou que é posible ter un concello transparente, onde todos os veciños e veciñas sexan tratadas por igual, un concello de portas abertas, profundamente democrático”.
A portavoz nacional do BNG puxo en valor a xestión dos gobernos do BNG:”Trátase dun modelo municipal de éxito, que funciona, transformando en positivo, revitalizando o comercio e o tecido económico local, xestionando con eficacia e mellorando a vida das persoas”.
