O candidato “galego” Juan Díaz Villoslada, reivindicou a Sumar como “a forza que ten capacidade para transformar a vida de moita xente” e que “presenta unha oferta transformadora, que aglutina a toda xente realmente progresista”.
Diferenciou esta opción con respecto a outras das esquerda: “Non estamos na liña das formulacións do BNG que son máis soberanistas” e dubidou do progresismo dun PSOE que en Europa apoia o pacto de migración e asilo ou “a volta ás regras fiscais”, e forma parte “dunha Gran Coalición” xunto con liberais e populares que “están abrindo a porta ás forzas máis ultra conservadoras”.
Nunha visita á emisora Radio Xallas para participar no programa “Na Encrucillada” explicou que “nos temos unha formulación altamente europeísta e moi internacionalista, cunha visión laborista”.
Defendeu o Pacto Verde Europeo:”Estamos diante dunha crise climática evidente se queremos construír unha Europa máis verde e máis sostible ten que haber obrigas ambientais con compensacións, non é incompatible coa actividade gandeira”.
Nunha comarca agraria referiuse á PAC: ”Hai que cambiar o modelo obsoleto de axudas da PAC e dar mellores posibilidades ós produtores e o rendemento que teñen as grandes corporacións ten que repercutir no gandeiro”.
Díaz Villoslada advirte que en Europa “hai un risco de regresión democrática” e pide o voto para Sumar que no goberno do estado “levou a cabo políticas importante como o aumento do SMI” ou o recoñecemento do estado de Palestina.
“Europa ten moito máis poder de decisión do que pensamos. É importante que Galicia teña capacidade de levar a súa voz” afirmou , lembrando a relevancia da UE en temas como a industrialización, as conexións ferroviarias, os dereitos sociais, o medio ambiente ou a problemática eólica.
