A candidata “número 1” pola provincia da Coruña de Espazo Común Galeguista, Luisa Feijoo, asegura que a súa formación aspira a converterse no “cuarto piar” da política autonómica como unha opción de “centro galeguista” xa que “somos un proxecto de futuro, vimos do municipalismo e sabemos de xestión e das necesidades dos concellos”.
Recortes do goberno, promesas da oposición
Nunha entrevista en Radio Xallas, valorou a xestión do PP “cun balance de recortes, cunha sanidade cada vez máis feble, problemas en educación con recortes en persoal. Non hai unha verdadeira política social”.
Pero tamén reprochou o papel da oposición:
“A oposición non pensa nos problema de Galicia. Tanto o BNG como o PSOE fan promesas e promesas. Hai que facer unha política para Galicia non pensando nos intereses ou que isto sirva de trampolín”.
Luisa Feijoo considera imprescindible “un plan de choque demográfico” con medidas transversais en materia fiscal, de vivenda ou de mellora das comunicacións de internet.
Apelou á necesidades dunha política de explotación do noso monte “cun aproveitamento forestal que teña en conta ós propietarios”.
Teresa Castro, candidata xalleira
A candidata Teresa Castro, veciña de Santa Comba que vai no sétimo posto, sinalou que unha característica de Espazo Común Galeguista e que tomarán en conta as peticións dos veciños e “imos a ser moi insistentes” coas súas demandas.
“En Santa Comba temos moitísimas necesidades e non se nos está escoitando” manifestou.
Na candidatura de Espazo Común Galeguista figura como número 4 o concelleiro de Mazaricos, Francisco Javier González Trillo e o exalcalde de Santa Comba, José Antonio Ucha (22).
