O piloto Alberto Meira proclamouse este domingo gañador do Rallyshow das Pontes, a proba central da Festa do Motor organizada pola Deputación da Coruña, que congregou ao longo da xornada a máis de 12.000 persoas no circuíto pontés.
A cita reuniu máis de trinta pilotos inscritos. Desde primeira hora, moito antes do inicio das mangas oficiais, centos de afeccionados agardaban nos accesos e as bancadas foron enchéndose ata rexistrar unha imaxe multitudinaria, con familias e seguidores chegados de distintos puntos de Galicia.
Durante a mañá exhibíronse sobre o trazado Stig Blomqvist, Miki Biasion e Petter Solberg, tres pilotos vinculados á historia do Mundial de Rallyes. Xunto a eles participou o coruñés Luis Moya, bicampión do mundo como copiloto de Carlos Sainz e padriño da cita.
A competición arrancou cos adestramentos libres e a manga clasificatoria e continuou pola tarde coas eliminatorias de oitavos e cuartos de final, as semifinais e a Gran Final. Nela, Meira logrou a vitoria aos mandos dun Skoda Fabia R5. O segundo posto foi para o dumbriés Manuel Senra, cun Hyundai i20 WRC, e o terceiro para Jorge Pérez, cun Porsche 911 GT3.
Na entrega de trofeos participaron o presidente da Deputación e alcalde das Pontes, Valentín González Formoso; o deputado portavoz do goberno provincial, Bernardo Fernández, e a concelleira de Deportes das Pontes, Elena López.
Entre manga e manga, as exhibicións e os drifts mantiveron a actividade sobre a pista. Fóra dela, a Fan Zone foi un dos espazos máis concorridos, con longas filas de seguidores que se fotografaron cos pilotos e recolleron autógrafos. O programa incluíu tamén un circuíto de educación viaria infantil e unha zona de restauración.
A xornada pechouse coa actuación da cantante Sés.
