A Deputación da Coruña celebrou este venres no Pazo Provincial o sorteo dos emparellamentos das fases finais da XXXIV Copa Deputación masculina e da VII Copa Deputación feminina de fútbol afeccionado. A competición masculina disputarase o sábado 1 de agosto en Miño, mentres que a feminina terá lugar a primeira fin de semana de setembro en Pontedeume.
Copa Deputación masculina
No torneo masculino competirán o Muxía CF, a SD Negreira, o San Tirso SD e a SD O Val de Narón. As semifinais enfrontarán ao San Tirso SD coa SD Negreira, ás 10.30 horas, e ao Muxía CF coa SD O Val de Narón, ás 12.30 horas. A final disputarase na tarde da mesma xornada.
Copa Deputación feminina
Na categoría feminina participarán a SR San Xoán de Calo, o Atlético San Pedro, o Xallas FC e a SD O Val de Narón. Os cruces de semifinais medirán ao Atlético San Pedro coa SD O Val de Narón, ás 10.30 horas, e ao Xallas FC coa SR San Xoán de Calo, ás 12.30 horas. A final celebrarase tamén na mesma xornada en Pontedeume.
A Copa Deputación reúne aos equipos campións das copas oficiais organizadas pola Real Federación Galega de Fútbol nas delegacións da Coruña, Costa, Ferrol e Sar. No caso da categoría masculina, o equipo vencedor obterá unha praza na Supercopa Deputación, na que participarán os campións provinciais de Galicia, e tamén para disputar a fase previa da Copa do Rei.
A Deputación da Coruña destina 24.000 euros en premios nesta edición. Os equipos campións recibirán 5.000 euros, os subcampións 4.000 e os catro semifinalistas percibirán 1.500 euros cada un. As convocatorias serán de ata 25 xogadores ou xogadoras por equipo e permitirán realizar cambios ilimitados para facilitar a disputa de toda a competición nunha única xornada.
