Un partido moi serio defensivamente, sen especular co resultado e facendo méritos para conseguir a vitoria. Estacionar un autobús en Fontela non era o plan, nin o carácter dun equipo que logrou un merecido ascenso. Escapouse a liga no último sospiro e este domingo caloroso non se podía fallar. E o Xallas non fallou.
O Xallas FC tivo enfrente un equipo que buscaba o mesmo tesouro, pero aínda tendo as súas ocasións e xogando a un nivel aceptable non propuxo demasiados argumentos para superar a un Xallas moi solvente.
Non se moviu o marcador en Fontenla. O Atlético Os Castros buscaba abrir ocos pero encontrouse un Xallas moi atento.No primeiro tempo Iván Couto tería varias intervencións, pero tamén Rubén Blanco e incluso Bryan cun tiro lonxano que non subiu o marcador sorprendentemente, poideron marcar.
No segundo tempo os visitantes non perdían a esperanza pero os puntais xalleiros levaban perigo a porta coruñesa con certa frecuencia. Sergio Barbeira ou o recén entrado Maca facían posible pensar na vitoria dos locais con xogadas perigosas e desequilibrantes. E incluso Bryan marrou unha pena máxima. O empate valía pero o Xallas quería gañar.
E durante todo o partido sempre houbo un Facal, un Peke ou un García, para abortar os ataques rivais. Destacar o esforzo de todos os efectivos do equipo adestrado por Doriño e Churián que certificaban unha tempada excelente. Un derroche colectivo de coraxe que se traduce nun ascenso histórico coa xusta celebración posterior polas rúas de Santa Comba. PARABÉNS
