“Unha vez cumpridos os obxectivos ligueiros, podemos pensar na Copa da Costa”. O adestrador do Xallas FC feminino foi claro desde un principio: “A prioridade foi sempre a Liga, pero unha vez que os obxectivos están encamiñados, podemos pensar na Copa da Costa”.
O Xallas FC recibiu un “chute” de enerxía co regreso dun piar moi importante como é Claudia Facal, que non oculta a súa ilusión pola final que se disputará contra o U.C. Cee no campo de Fontenla: “Sabendo que se xoga a final en Santa Comba, teño o dobre de ganas”.
A Eloy García Feteira tamén lle apetece sumar un trofeo máis e seguir completando a impresionante historia do equipo xalleiro: “Imos pelexar pola Copa da Costa e ogallá que a gañemos. Serían tres títulos en tres anos, o que sería unha barbaridade, porque cada ano sorpréndeme máis este grupo e todo o que están facendo”.
Entrevista a Claudia Facal e Eloy García en Radio Xallas
Un equipo infantil feminino en Santa Comba
Nunha entrevista en Radio Xallas, o adestrador avanzou que “a idea é crear outro equipo feminino de cara ao ano que vén, e tentaremos crear un infantil feminino”.
Para Eloy García, isto suporía “darlle outro plus ao fútbol feminino e saír competir con tres equipos”. Aproveitou tamén para valorar o traballo que están realizando no Xallas B, que este ano debutou na Liga da Costa.
