A S.D. Castriz prolonga a súa racha positiva, coincidindo coa chegada do novo adestrador, José Barca.
En competición ligueira, o equipo gañou ao Club do Mar en San Pedro, sumou dous empates co Tordoia e o Arzúa, e superou o Cire de Melide.
Esta fin de semana presentábanse dous emparellamentos complicados: a eliminatoria da Copa da Costa contra o Xallas e un partido en Brión fronte a un rival da zona baixa, o Bastavales.
E o equipo foi quen de sumar dúas vitorias, que lle permiten seguir adiante na competición copeira e afastarse da zona baixa na Primeira Autonómica, ao superar a domicilio un rival directo e gañar o gol-average.
Marcos Mouro resolve dúas veces
No encontro de Santa Comba, o Castriz superou o Xallas por 2-3, cunha actuación destacada do porteiro Coke nos primeiros minutos, que evitou que os locais aumentasen a diferenza tras o primeiro tanto de Bryan. Anxo e Fabio Blanco daban a volta ao marcador, pero Doro, “o Tigre de Bazar”, empataba, e Marcos Mouro resolveu o partido.
E no municipal de Brión volveu resolver Marcos Mouro, desfacendo o empate do Bastavales tras o tanto inicial de Fabián.
En declaracións a Radio Xallas, José Barca destacou o compromiso dos seus xogadores: “Hai que quitarlles o sombreiro polo esforzo titánico que fixeron esta fin de semana”.
