Desde os concellos de Vimianzo e Laxe denunciaron actos vandálicos contra varios sinais dos Penedos de Pasarela e Traba “que foron arrancados, rotos e tirados”. Consideran que foron accións “premeditadas”.
A alcaldesa de Vimianzo, Mónica Rodríguez, resaltou a importancia de “coidar do noso para que os servizos públicos poidan ser de calidade” e engadiu que “este tipo de comportamentos danan o ben común e aféctannos a todos. Trátase de actos que atentan directamente contra o esforzo colectivo por preservar o noso patrimonio natural”.
O alcalde de Laxe, Francisco Charlín, manifestou que se trata “de algo moi grave, que prexudica tanto aos nosos veciños e veciñas como a todos os visitantes que se achegan a descubrir este espazo”.
Os dous concellos fan un chamamento á colaboración cidadá “para tratar de esclarecer o sucedido. Calquera mínima información, por pequena poida parecer, pode ser de gran axuda”.