Carlos Rieiro Blanco ten 25 anos pero xa presenta unha folla de servizos potente xogando en Preferente, Primeira Autonómica ou na Liga Nacional Xuvenil. Defendeu oito tempadas a camiseta do Xallas FC, vestindo tamén a elástica da S.D. Dubra e do S.D. Conxo xuvenil.
Cando lle falamos do obxectivo marcado para esta tempada de manterse na Primeira Autonómica discrepa:
“A humildade é esa, a verdade que non me… Mirando o equipo, liña por liña, temos que estar arriba si ou si. Quero estar o máis arriba posible, entre os cinco primeiros”.
O chaval da Ponte, que comezou xogando de porteiro de neno, valorou varias opcións pero escolleu como destino Castriz. E non se arrepinte.
«Necesitaba un equipo para volver a ilusionarme co fútbol»
“Necesitaba un equipo para encontrarme. Para volver a ilusionarme co tema do fútbol. Estou ao ladiño na casa e nunha boa categoría”.
Agora mesmo intenta recuperarse dunha lesión pero segue como seareiro animando ao club. Destaca que é unha familia.
“É unha burrada a nivel tanto de directiva como afección como no equipo. Están todos unidísimos. Por exemplo, no campo do Vea (A Estrada) había máis afección do Castriz que do equipo local. E en Carral igual”.
E, como pasou durante a visita de Miller a Radio Xallas, non se esquece das palabras máxicas: “A directiva implícase. Temos torillas, churrasco. Estamos moi ben coidados”.
