O adestrador da S.D. Castriz, Miguel Chouza está “moi satisfeito polo rendemento do equipo nestas primeiras xornadas”, malia que entende que aquí “cada partido é unha batalla distinta. En canto a puntos está moi ben pero en canto a dinámica non me aporta moito”.
En declaracións a Radio Xallas, Chouza pensa que con respecto á anterior tempada “Temos mellor equipo. Hai que ver como se conxunta todo aínda que pinta ben”.
Xa por pura “lóxica” pensa que o equipo “debería estar arriba” na Liga da Costa pero hai que demostralo no terreo.
Evitar a relaxación
Das dúas vitorias extrae datos positivos pero tamén detalles a mellorar:”Hai que evitar certa relaxación e falta de intensidade en algúns momentos do partido”. Polo demais “hai que saberse adaptar o que pase no campo”.
A S.D. Castriz logrou artellar unha escuadra moi competitiva con 21 xogadores máis tendo en conta que “a unha semana de comezar a pretempada tiñamos 12 xogadores”.
A planificación e a confección dunna plantilla é tan importante que para Miguel Chouza “o mes máis determinante da tempada é agosto”.
Este domingo en San Pedro reciben ao Cabana.
