O servizo municipal de Deportes de Mazaricos fixo públicas hoxe as cifras de persoas inscritas nas distintas actividades deportivas programadas para este curso. Estas inclúen tanto clases de Pilates, ioga, bádminton e tenis, englobadas dentro das Escolas Deportivas, como a ximnasia por parroquias.
No caso das Escolas Deportivas, preto de 90 persoas están inscritas nas aulas ofertadas. En Pilates e ioga hai 28 participantes en cada actividade, e nas clases de bádminton e tenis hai unha trintena de persoas anotadas. Todas as actividades comezaron a impartirse durante esta semana, repartidas en diversas quendas e días.
En canto á ximnasia por parroquias, un ano máis volverá celebrarse esta actividade descentralizada que permite á veciñanza achegarse á práctica da ximnasia independentemente do seu lugar de residencia.
As sesións celebraranse ao longo da semana en Asenso (Chacín), Suevos (Coiro), as Maroñas, Arcos, San Cosme, Colúns, Eirón e a Picota (Mazaricos). Un total de 80 persoas participarán na actividade entre todas as parroquias.
Nota do Concello de Mazaricos
