“Non podemos apoiar un proxecto para crear máis enerxía cando este só vai traer un impacto negativo para a nosa zona e para a xente que nela vive” manifestan os veciños desta parroquia carballesa.
Un grupo de veciños de Entrecruces solicitou no pleno de Carballo o apoio dos grupos políticos deste concello para que se inste á Xunta á non aprobar e a revisar os proxectos dos parques eólicos do Campelo, O Bustelo e Monte Toural e tamén das Liñas de Alta Tensión O Campelo-Mesón do Vento.
José Antonio España foi o encargado da lectura dun texto na sesión plenaria no que asegurou que non estaban en contra das enerxías renovables “pero iso non significa que estemos a favor da destrución do rural”.
Afeccción ambiental, social e económica dos viraventos
Entre os seus argumentos destacan as afeccións ambientais “con especies protexidas como a Centaurea Ultreia, que en todo o mundo só medra nesta zona e está recollida no catálogo de especies protexidas coa categoría de en perigo de extinción”. E tamén as afeccións sociais xa que consideran que “estas instalacións alteran o noso modo de vida e, o que é peor, a nosa saúde”.
Tamén inciden na proximidade dos muíños ós núcleos habitados e o ruído e o “zumbido continuo” que deberían de soportar e que exerce un efecto nocivo sobre a saúde. Tamén perciben afeccións económicas e contan “cunha previsible perda do valor do monte, e coa destrución de postos de traballo vinculados á agricultura”.
