A 41ª edición da Festa da Carballeira de Zas deu comezo este venres cunha masiva acollida de público no seu espazo natural, reafirmándose un ano máis como a gran cita do folk e da música de raíz en Galicia.
Antes do inicio dos concertos, o público puido gozar da volta de Lupe Blanco á Carballeira, que regresou para presentar esta edición do festival e puxo a todos os asistentes a ruxir co tradicional berro de «Ei Carballeira!».
A programación arrancou pasadas as 22:30 horas coa proposta dos burgaleses El Nido, que abriron a noite coa súa orixinal revisión do folclore ibérico, combinando os sons tradicionais de Castela e León con matices pop e un marcado carácter festivo. O grupo animouse ademais a tocar un tema xunto ao público, poñendo a cantar e bailar a toda a Carballeira.
Un dos momentos máis agardados da xornada chegou coa entrada en escena de Baiuca. O proxecto galego volveu demostrar a súa forza en directo cun espectáculo potente e visual onde a electrónica de vangarda e a tradición musical puxeron a bailar a todo o recinto.
A recta final no escenario principal correu a cargo do músico bretón David Pasquet, quen mantivo o ritmo da Carballeira de madrugada cunha enérxica proposta que uniu o son característico da bombarda cos ritmos electro.
Hoxe sábado: o día grande da Carballeira de Zas
Tras esta primeira xornada de éxito, A Carballeira de Zas vive hoxe o seu día principal. Desde o mediodía e ata ben entrada a madrugada, o recinto acolle máis de doce horas de programación con espectáculos familiares, música tradicional, foliada e os grandes concertos da noite.
Nota de prensa- Organización Festa da Carballeira de Zas
