Dumbría presenta unha programación cultural de verán con teatro, contacontos, música e actividades familiares durante o mes de xullo
O Concello de Dumbría, a través da súa área de Cultura, organiza durante o mes de xullo unha programación de actividades dirixida a públicos de todas as idades, cun calendario que combina teatro, narración oral, espectáculos familiares, música tradicional, exposicións e obradoiros en diferentes localidades do municipio.
Títeres
A programación arrancará o martes 7 de xullo coa apertura dunha exposición no centro sociocultural do Conco, que poderá visitarse ata o día 10 en horario de 10.00 a 13.30 horas. Nesas mesmas datas, a Asociación Morra o Demo impartirá un obradoiro de títeres para persoas adultas, con reserva previa de praza, ademais dun videofórum tamén destinado ao público adulto. O programa inclúe igualmente unha sesión de Títeres: Barriga Verde prevista para o xoves 9.
As actividades continuarán o sábado 11 coa Foliada das Neves, en Buxantes, a partir das 19.00 horas, coa participación da Asociación Recreativa e Cultural Fonte Santa e dos Gaiteiros Buxantes.
A programación infantil terá un peso destacado durante o mes. O martes 14, Babaluva Teatro representará A filla do Cacharulo, un espectáculo de monicreques no Conco ás 11.00 horas. Tres días despois, o venres 17, Carmen Domech ofrecerá a narración oral Petróglifos, tamén no Conco e á mesma hora.
Festa da Familia en Berdeogas
O domingo 19 celebrarase en Berdeogas a Festa da Familia. Pola súa banda, os campamentos infantís acollerán o martes 21 a representación teatral Máis Saaabor, da compañía Culturactiva, e o mércores 22 o contacontos Hamelin, tamén a cargo da mesma entidade. Ambas actividades desenvolveranse ás 11.00 horas.
Na recta final do mes, o domingo 26, Olveiroa será escenario do espectáculo familiar Cruunch 2, da compañía Muu, previsto para as 20.00 horas. O programa concluirá o xoves 30 coa proposta A Corva, un contacontos musical de A Cova das Letras, que terá lugar no Conco ás 11.00 horas.
