A escritora xalleira Sonia García Espasandín irrompe no panorama literario coa súa primeira novela, Donde aún respira su nombre(Amazon), unha obra que afonda nas emocións humanas a través dunha historia marcada pola perda, o amor e as decisións difíciles.
Tal e como explicou nunha entrevista en Radio Xallas, o libro nace dunha reflexión profunda: “Este libro naceu sobre todo dunha reflexión sobre o duelo (dó) e as segundas oportunidades. Sobre todo, como pode afectar o teu pasado a toma de decisións” .
A novela sitúa ao lector na vida de Clara, unha muller que regresa ao seu lugar de orixe para pechar unha etapa marcada pola morte do seu irmán. A partir dese punto, a historia constrúese arredor do proceso de aceptación e da dificultade de avanzar cando o pasado segue presente. “É unha historia sobre o duelo (dó), do amor inesperado e das decisións difíciles que aparecen cando todavía o pasado pesa” .
Entrevista en Radio Xallas
A autora constrúe personaxes cun forte compoñente humano, cheos de contradicións e emocións recoñecibles. Clara representa esa loita interna entre avanzar e quedar ancorada no vivido, mentres que Mateo introduce unha dimensión de cambio e conflito que impulsa a evolución da protagonista.
Lonxe de ser unha obra autobiográfica, García Espasandín define o libro como un exercicio de exploración emocional: “é un proceso de reflexión, de emocións humanas. Sobre todo da pérdida, da culpa, do amor, da capacidade de seguir adiante incluso cando cremos que non podemos” .
Ademais, o proxecto conta cunha vertente solidaria, xa que parte da súa finalidade é contribuír á investigación do cancro de páncreas, engadindo así unha dimensión social ao seu contido literario.
