O proxecto musical de Lg1do , nome artístico de Saúl Rodríguez Maroñas, un mozo de 17 anos natural de Santa Comba, medra a gran velocidade impulsado polas redes sociais e por unha aposta clara: facer música actual en galego sen complexos. Así o explicou nunha extensa entrevistaa Xosé Manuel Lema en Radio Xallas, onde repasou os seus inicios, o seu proceso creativo e o inesperado éxito acadado nos últimos meses.
Un inicio autodidacta durante a pandemia
A relación de Saúl coa música comezou durante a pandemia. “No 2021 empecei co teléfono, cos cascos do móbil, buscando bases en YouTube e escribindo letras”.
No 2025 decide difundir o seu primeiro tema en galego:“É o meu idioma, é moito máis fácil expresarse no que falas no día a día”, explicou.
‘Frente a frente’, o tema que marcou o cambio
O primeiro tema en galego, “Frente a frente”, marcou un antes e un despois. A canción, cunha temática de desamor e unha sonoridade próxima ao bolero e aos ritmos latinos, conectou rapidamente co público.
“Subín un vídeo a TikTok por probar e ao día seguinte tiña 50.000 visitas”, lembrou. En poucas semanas, o tema acadou cifras que o propio artista cualificou de impensables, sumando unhas 200.000 reproducións en Spotify.
Un proceso creativo intuitivo
No plano creativo, Lg1do traballa sempre a partir da música. “Primeiro escollo a instrumental, e a partir de aí van saíndo as melodías e a letra”, explicou. As bases son adquiridas a produtores, xa que aínda non compón a música, e o proceso continúa de maneira intuitiva, gravando ideas no móbil cando aparece a inspiración.
Música, estudos e fútbol
A pesar do éxito, mantén os pés na terra. Compaxina a música cos estudos de segundo de Bacharelato e xoga ao fútbol no Xallas FC de Santa Comba. Destacou o apoio da súa familia desde o primeiro momento.
O galego como aposta de futuro
En canto ao futuro, o artista xalleiro non pecha portas nin idiomas, aínda que defende con convicción a súa elección actual. “O galego é tan válido como o castelán ou o inglés para facer música”, afirmou, lembrando que moita xente escoita cancións en idiomas que non entende.
Con novos lanzamentos previstos a curto prazo e unha audiencia en crecemento constante, Lg1do vive este momento como un inicio. “Se se ten que dar, darase. A música é para desfrutar”, resumiu. Unha filosofía sinxela para unha carreira que, por agora, xa comezou a soar forte desde Santa Comba.
