O Concello de Mazaricos ofrece este próximo fin de semana unha programación musical diversa coa celebración de dous eventos culturais de entrada gratuíta no Auditorio da Casa da Cultura da Picota: o tradicional Concerto de Nadal da Escola de Música Moderna e o concerto do grupo folk Tres Pesos.
Programación musical
•Sábado 20 de decembro ás 12:00 horas:
Concerto de Nadal da Escola de Música Moderna de Mazaricos, onde o alumnado mostrará os seus progresos cun programa musical variado e cheo de entusiasmo.
•Domingo 21 de decembro ás 17:00 horas:
O grupo Tres Pesos (formado por Xoán Porto, José A. Ferreira e Felisa Segade) presentará o seu espectáculo «Contares e Cantares», un viaxe pola esencia musical galega que combina tradición oral e melodías populares.
Dúas propostas, un mesmo compromiso coa cultura
O Concerto de Nadal da Escola de Música Moderna supón a culminación do traballo desenvolvido polo alumnado durante o primeiro trimestre do curso, nun acto que se converteu nunha tradición nestas datas festivas no concello.
«É un orgullo ver como os nosos alumnos e alumnas van medrando musicalmente e poden mostrar en público o froito do seu esforzo», sinalou o técnico de Cultura, Suso Jurjo.
Pola súa parte, o concerto de Tres Pesos recupera o vínculo coa tradición oral galega. O grupo, que conta coa participación de Felisa Segade -membro do desaparecido grupo Leilía e antiga profesora de baile e pandeireta en Mazaricos-, propón unha reflexión musical sobre a identidade galega a través de cantigas e relatos tradicionais.
Acceso gratuíto
Ambos eventos terán entrada libre e gratuíta ata completar o aforo do auditorio. Dende a organización recoméndase acudir con antelación para garantir a praza.
Nota de prensa Concello de Mazaricos
