40ª edición da Carballeira de Zas con Tanxugueiras, A Banda da Loba, SÉS, Mercedes Peón, Catuxa Salom, Señora, Carmela ou Caamaño e Ameixeiras.
Na cidade da Coruña tivo lugar a presentación do cartel da 40ª edición da Festa da Carballeira de Zas, que se celebrará os días 8 e 9 de agosto. Esta edición estará centrada integramente en artistas femininas como homenaxe ás cantareiras e ás mulleres da música galega.
No acto participaron o alcalde de Zas, Manuel Muíño; a deputada de Cultura da Deputación da Coruña, Natividade González; e a representante de Estrella Galicia, Loreto Rodríguez Fuentes. Tamén estiveron presentes o director do festival, Fidel Otero, e as artistas SÉS e Mercedes Peón.
Un programa potente
A programación do venres 8 de agosto inclúe as actuacións, pola noite, de Catuxa Salom, Tanxugueiras e Agoraphobia.
O sábado 9 comezará ás 12:00 h coa música infantil de Uxía Lambona e a Banda Molona, seguida de A Banda da Loba. Pola tarde terá lugar a Gran Foliada, coa participación de agrupacións como Chorima, Gaiteiras de Xiradela, Pandereteiras de Raigañas, Gaiteiras de Buxantes, As Lerchas e Xela Cantareira. O proxecto Carmela pechará a sesión da tarde.
Na sesión nocturna do sábado actuará Caamaño Ameixeiras, seguida de Mercedes Peón, SÉS e Señora DJ.
A organización ofrece unha zona de acampada gratuíta próxima ao recinto do festival, con servizos de baños e duchas. O evento contará tamén con espazo gastronómico, feira de artesanía, zona infantil e sesión vermú. DESCARGAR FOLLETO COA INFO DAS ARTISTAS
Entradas para a 40 Festa da Carballeira
As entradas poden adquirirse na web oficial do festival e nas súas redes sociais. Os prezos van desde os 10 € para o abono dun día ata os 18 € para os dous días en venda anticipada online. En taquilla, o custo será de 15 € por día ou 25 € polo abono completo.
O alcalde de Zas, Manuel Muíño, salientou o crecemento constante do evento e a súa relevancia dentro do panorama galego, ademais de agradecer o traballo dos voluntarios que o fan posible cada ano.“Supérase ano tras ano, só hai que ver as artistas que participarán na Carballeira deste ano para saber que é un dos festivais de referencia en Galicia” aformou.
Desde a Deputación da Coruña, Natividade González, subliñou o compromiso da institución co festival, ao que apoian economicamente pola súa capacidade para xerar riqueza cultural e manter viva a tradición.
Pola súa parte, Loreto Rodríguez, de Estrella Galicia, destacou a conexión entre os valores da marca e o espírito da Carballeira.
O director do festival, Fidel Otero, explicou que a decisión de facer unha edición integramente en galego e feminina responde tanto á celebración do 40 aniversario como ao contexto de recoñecemento ás mulleres da música tradicional.
Entre as artistas participantes, SÉS reivindicou o papel do festival como plataforma fundamental para a música galega e para a súa propia carreira, mentres que Mercedes Peón describiu a Carballeira como un espazo de resistencia cultural e autoestima a través da música.
