As cantareiras galegas de Arxentina celebraron o Día das Letras cunha gran xuntanza en Bos Aires
As agrupacións de cantareiras galegas en Arxentina celebraron o Día das Letras Galegas cunha emotiva xuntanza na sede da Sociedade Parroquial de Vedra, en Bos Aires. O encontro, auspiciado pola Xunta e que reuniu a formacións de todo o país, combinou participación presencial e virtual, e estivo marcado pola música tradicional, a poesía e o entusiasmo colectivo, malia as fortes tormentas que afectaron a parte do territorio arxentino.
Desde Arxentina, a xalleira Fina Gerpe destacou o éxito da iniciativa: “Foi todo un éxito a pesar das tormentas torrenciais. Interpretáronse cantigas e poemas en galego. É a primeira vez que as Letras se festexan con tanto entusiasmo. Foi unha celebración á altura da nosa lingua”.
A cita reuniu a agrupacións como a Sociedade Parroquial de Vedra, o Centro Arzuano Mellidense, a Asociación Unión Residentes de Outes, as Cantareiras de Santa Comba de Xallas, Centro Galego Comodoro-Ribadavia, o Centro Galego de Rafaela, o Val Miñor de Bahía Blanca, o ABC de Corcubión, o Centro Galicia de Bos Aires, entre outros. As cantareiras do interior que non puideron desprazarse, como as de Rosario, enviaron vídeos, mesmo gravados na ruta onde quedaron varadas polas inundacións.
O delegado da Xunta en Arxentina, Alejandro López Dobarro, puxo en valor o labor das asociacións e das cantareiras na difusión da cultura galega e no fortalecemento dos vínculos entre Galicia e Arxentina. O encontro rematou cun canto conxunto e un abrazo simbólico entre todas as agrupacións participantes.
