Os do Fondo da Barra lanzou este ano seu primeiro disco titulado “Banzo” cun feixe de cancións moi vencelladas á comarca como o “Pasodobre de Meanos”, “Xota de Carreira” ou a “Muiñeira de Carnés”.
Nunha entrevista en Radio Xallas, un dos compoñentes da banda, Quique Peón explicou como “este grupo xurdiu no seo do grupo Xacarandaina, está composto por compoñentes e ex-compoñentes do grupo, que nos gusta cantar xuntos, íamos a cantar de tabernas”.
Acabaron lanzando un disco e ofrecendo os primeiros concertos, por exemplo na Festa da Carballeira ou no Teatro Colón.
“Xa levamos un tempo cantando xuntos pero demos unha volta de torca e musicamos todos os temas e demos un punto máis folk, digamos”.
«Banzo» un espectáculo de arte escénico
E desde hai meses, nas plataformas musicais, xa se pode escoitar este disco “Este Banzo, como chanzo, é subir un banzo dentro da música dos homes, porque os cantos de taberna son músicas que estaban única e exclusivamente para os homes”.
A conexión de Quique Peón coa zona é coñecida: “Eu non son da comarca do Xallas ou de Bergantiños, pero case, porque dei clase de baile e de canto tradicional na comarca durante vinte e tantos anos”.E nestas terras fixo un tremendo traballo de campo.
Con respecto ao novo traballo, Peón destaca que hai máis ca música: “Non podo escapar dos meus planteamentos escénicos, e Banzo é un espectáculo de arte escénico, facemos unha posta en escena moi pensada e moi traballada, moi teatral, que a ninguén de momento deixou indiferente”. Son Os do Fondo da Barra.
