Comentaba en Radio Xallas, a actriz Stephy Llaryora, que Neura “é unha creación colectiva que parte da idea de quitarlle o estigma ao tema da saúde mental a través dunha comedia neurótico festiva”.
Así é. A representación desta obra dentro do ciclo de artes escénicas do concello de Santa Comba logrou o seu obxectivo e gustou ao público.
Esta quinta produción de De Ste Xeito Producións é un espectáculo dinámico, neurótico, divertido, onde Stephy Llaryora e Sergio Macías intercambian, con mestría e axilidade, diferentes papeis que complementan os protagonistas. Dous ex que se reencontran. Cada un coas súas cousas.
Unha comedia intensa e con moito humor. Pero tamén con mensaxe e reflexión. Con esa chamada a comprensión e a empatía en relación coa saúde mental.
A compañía xa deixara o listón alto en Santa Comba coas anteriores representacións, “Lolo y Mamá”, “Running” e “Feminísimas”. Nesta ocasión, subimos un chanzo máis.
Entrevista a Stephy Llaryora en Radio Xallas- Desde minuto 62
