– Xosé Manuel Lema-
José Manuel Rodríguez “Isi” é un valor seguro para rematar o ciclo “RiXallas” de Santa Comba. Ou para facer que nos “escarallemos” e haxa unha explosión de gargalladas en calquera auditorio. Co seu estilo de home rural que trae consigo unha mochila de historias:”Levo recopilando anécdotas toda a vida. É o legado da miña nai ou da miña tía. A maioría son reais” afirma.
E esas historias son a base dos monólogos:”Teño un repertorio de contos e despois vou improvisando”. Porque Isi tamén cree no poder terapéutico das risas:”Rir fai moito ben, é saúde. A xente quere rir e desconectar. Fai falta humor”.E da necesidade das actividades culturais:”Sen cultura non podemos vivir. Que faríamos confinados sen un libro ou unha película para ver?.
ENTREVISTA A ISI EN RADIO XALLAS-DESDE O MINUTO 59
A situación segue sendo estraña:”Vas pola rúa e ves miradas pero non sorrisos. O que máis boto de menos son os abrazos e os sorrisos”.A Isi non lle falta traballo e séntese agradecido. Monólogos, e participacións en programas como o mítico espazo de Radio Galega “Pensando en Ti” que dirixe Marcial Mouzo, ou o “Bamboleo” de Xosé Manuel Piñeiro na TVG.
Este venres volverá a terras xalleiras con “anécdotas simpáticas e curiosas para facer rir”. Considera que hai que seguir adiante “con moita preocupación e respecto e seguindo os consellos das autoridades”. Claro que sí, e con “chutes” de retranca e chistes do artista estradense, todo será máis doado.
