O luns comeza a retirada de invitacións na Casa da Cultura de Santa Comba.
O cuarto ciclo de monólogos cómicos organizado polo departamento de cultura do concello de Santa Comba “RiXallas” agarda unha nova edición, que continúa co alto nivel de convocatorias anteriores .
Nesta edición, e atendendo a nova lei de espectáculos de Galicia, o aforo é limitado, e aínda que a entrada continúa sendo de balde, deberán retirarse invitacións uns días antes de cada función, como ben se explica no cartel anunciador.
Xosé Antonio Touriñán inaugura o RiXallas 2018
RiXallas comezará cun monólogo do popular e televisivo Xosé Antonio Touriñán o venres 21 de setembro. As invitación poderán recollerse desde este vindeiro luns 17 de setembro a partir das 9 da mañá e ata as 14h.
O actor coruñés Xosé Antonio Touriñán é coñecido polas súas intervencións en programas como “Land Rober” ou “Luar”, e por formar parte do dúo “Mucha e Nucha”. Tamén traballou en series como “Fariña” ou “Padre Casares”.
Iglesia, Orsi e Luís Zahera
A segunda función traerá a outros dous coñecidos cómicos, Luís Iglesia e Marcos Orsi, co espectáculo “Senior”. Será o venres 5 de outubro. O inicio da recollida de invitacións está fixado para o 1 de outubro.
Para rematar o ciclo xalleiro, o 19 de outubro actuará Luís Zahera, que conta cunha ampla biografía de participación en series e películas, aínda que na Costa da Morte sempre se lembrará o seu papel como “Petróleo” na serie “Mareas Vivas”.
O ano pasado RiXallas contou coas actuacións, entre outros, de Carlos Blanco e Manuel Manquiña.
