Falar sen cancelas.Trío de humoristas para rematar con éxito o ciclo de monólogos cómicos.
O ciclo de monólogos cómicos organizado polo departamento de cultura do concello de Santa Comba, por terceiro ano consecutivo, pechouse cun auditorio do multiusos cheo, con moitas risas e brindando coa apócema máxica dos galegos, que disque é o licor café. E creemos que están no certo.
Despois de dous pratos fortes que desbordaron as previsións (Falamos da actuación de Manuel Manquiña e de Carlos Blanco, a máis concorrida das tres edicións) chegou a quenda de tres vellos coñecidos do público da bisbarra que deixaron no máis alto a bandeira deste ciclo que aspira a converterse nun referente comarcal.
Isabel Risco, Pedro Brandariz e Fran Rei deleitaron ao público co seu espectáculo «Falar sen cancelas».Diante dun auditorio entregado inxectaron continuas doses de humor. O obxectivo era divertise e así foi. RiXallas baixou o pano pero os seguidores dos actos culturais terán outros eventos en Santa Comba este vindeiro mes de novembro. Seguiremos informando.