A magnífica actuación do monologuista e actor arousán veuse compensada cun cheo histórico.
A actuación de Carlos Blanco recordarase en Santa Comba por unha fotografía pouco habitual no auditorio do multiusos.Butacas cheas, ducias de persoas sentadas no chan, en cadeiras colocadas a maiores ou de pe, seguindo o magnífico espectáculo que durou 65 minutos. O tempo pasou voando ata para os que estiveron nas localizacións máis incómodas.
Carlos Blanco meteuse ao público no peto desde o inicio da función e as gargalladas e os aplausos xa conformaron a banda sonora orixinal deste evento. O actor arousán asistiu a unha cerimonia que supuxo a definitiva confirmación de que a xente quere RiXallas e que o evento ten unha posibilidades enormes para ser un aliciente, para os xalleiros pero tamén unha forma de atraer xente de fora e de proxectar a imaxe do concello.
Cos “seus mellores monólogos” Blanco Vila divertiu aos espectadores, acompañado de efectos sonoros e de luces. Monólogos de distintas épocas e temáticas recollidas nun só pase.
Non esqueceu o compoñente local e houbo distintas alusións a Santa Comba, Zas, A Baña ou Negreira ou a propia movida xalleira. Se a actuación de Manuel Manquiña desbordou as previsións, a de Carlos Blanco supuxo o récord dos tres anos de RiXallas e situouse no nivel dos actos máis concorridos deste recinto.Como é costume houbo representación da corporación local, nesta ocasión, asistiron os concelleiros do PP, Esther Espasandín e Juan Carlos Pérez e os socialistas José Antonio Ucha e Miguel Caamaño.
RiXallas 2017 terá a última actuación o vindeiro venres 20 de outubro ás 10 da noite con tres artistas xuntos no escenario. Pedro Brandariz, Isabel Risco e Fran Rei. Unha excelente maneira de despedir un ciclo de monólogos cómicos histórico. Os tres xa son vellos coñecidos do público local e nesta ocasión chegan para “Falar sen cancelas”.
