Unha entidade sen ánimo de lucro para a investigación, estudio e divulgación do mundo xacobeo que dirixe Xesús Palmou.
O Hostal dos Reis Católicos acollerá o vindeiro mércores 23 de novembro a presentación da Academia Xacobea, o centro de estudos da Orde do Camiño de Santiago, que preside Miguel Pampín Rúa.
Aínda que a presentación para os membros da Orde do Camiño de Santiago e outros convidados será a vindeira semana, a Academia Xacobea, que dirixe Xesús Palmou xa está operativa e de feito xa ven de asinar un convenio de colaboración coa editorial Ediciones Carena para a difusión da obra de Ulises Bértolo “Orthodoxia”, un thriller histórico relacionado co Camiño xacobeo. O presidente da Orde do Camiño de Santiago, Miguel Pampín, e Palmou Lorenzo asistiron a presentación deste libro.
Outro dos proxectos da nova Academia Xacobea é a convocatoria dun premio de novela “Camino de Santiago” en castelán e galego, e xa realizaron un protocolo de colaboración coa Consellería de Cultura, Educación e Ordenación Universitaria.O director da Academia Xacobea, Xesús Palmou, asegura que a entidade nace “cunha vocación sen ánimo de lucro para a investigación, estudio e divulgación do mundo xacobeo na súa vertente científica e artística”.
A Orde do Camiño de Santiago, con sede na capital de Galicia, conta con damas e cabaleiros repartidos por todo o mundo. Recentemente celebraron un capítulo extraordinario en Santiago de Saltillo en México e tamén entregaron o Gran Colar da Orde á vicepresidenta da República de Costa Rica, Ana Helena Chacón Echeverría.