O Concello da Laracha presenta o cartel da nova edición do ciclo Venres Teatrais, toda unha referencia na programación cultural municipal que se organiza co obxectivo de ofrecer aos veciños espectáculos teatrais de alta calidade durante o mes de novembro. O ciclo inclúe catro obras excelentemente valoradas polos expertos e protagonizadas por destacados actores do panorama audiovisual galego.
A comedia terá unha especial relevancia neste programa, aínda que tamén haberá espazo para a concienciación social cunha obra que se incluirá no marco do programa de actividades en torno á conmemoración do 25 de novembro como o Día internacional para a eliminación da violencia contra as mulleres.
Os Venres Teatrais abriranse o 4 de novembro con Nosa Señora das Nubes, unha adaptación de Teatro do Morcego da obra escrita polo dramaturgo arxentino Arístides Vargas e interpretada por Celso Parada e Josi Lage. Céntrase no encontro de dúas persoaxes expatriadas nun espazo e tempo indeterminados no que pretenden recuperar historia vividas no seu país por medio de recordos e memorias fragmentadas. Estamos ante un espectáculo poético, musical e humorístico moi actual que permitirá ao espectador reflexionar sobre as guerras, o desarraiga e as ditaduras.
Lautana de Teatro representará o 11 de novembro o seu último espectáculo, O esperpéntico caso do obreiro do futuro, con Isabel de Toro, Paco Alvarellos e Juan Mariñas baixo a dirección de Luis Vivancos. A obra está ambientada nun futuro sombrío no que un obreiro se atopa envolto, xunto á súa muller e un férreo representante do poder establecido, nunha trama rocambolesca e subversiva, de consecuencias sorprendentes e imprevisibles.
O 18 de novembro será a quenda para unha das pezas teatrais galegas máis exitosas do momento: Noiteboa, da compañía Redrum Producciones. Ernesto Chao, Mela Casal e Guillermo Carbajo protagonizan a montaxe ambientada nun Nadal compostelano no que se pon o foco sobre as apariencias sociais a través dunhas personaxes que, canda menos durante unhas horas, intentarán actuar como unha familia de verdade.
O ciclo pecharase o 25 de novembro con Retrato en branco e negro, da asociación coruñesa Ditirambo Teatro, onde dúas mulleres, nai e filla, se enfrontan ao pasado tras dezasete anos de dolorosa separación. O encontro prodúcese na casa familiar onde o tempo parece non deterse. Pola súa temática, a peza tamén se inclúe no programa de actividades e actos municipais en torno ao Día internacional para a eliminación da violencia contra as mulleres, que precisamente se conmemora nesa mesma data.
Todos os espectáculos son recomendados para persoas maiores de trece anos de idade e poranse en escena na Casa da Cultura da Laracha a partir das 21:00 horas, con entrada libre e gratuíta para todos os veciños que estean empadroados no noso Concello.
Fonte-Concello da Laracha